Politikani dhe drejtuesi i Nismës Thurje, Endri Shabani ironizon këngëtarët që i janë bashkuar kryebashkiakut Erion Veliaj, në këtë fushatë zgjedhore, duke bërë video-mesazhe me lëvdata për punën e tij në tetë vite për Tiranën.
“Dhe kur ata thonë që “Erioni punon”, kanë të drejtë. Erioni punon për ta dhe për lagjen e tyre. Në lagjet e tyre nuk ka kulla, ka vende parkimi, ka siguri dhe qetësi, ka ujë 24 orë dhe ajër të pastër”, shkruan ndër të tjera Endri Shabani.
Më tej, ai kujton kohën kur Partia Socialiste nxirrte në spote elektorale njerëz të zakonshëm, sepse atëherë kërkonte votat e atyre që jetonin në lagje të zakonshme. Ndërsa tani, thotë kreu i Nismës Thurje, njerëzit e zakonshëm janë zëvendësuar nga VIP-at.
“Kemi dy të vërteta, pasi secili nga ne jeton në lagje të ndryshme, në një Tiranë që ofron dy realitete të ndryshme. Prandaj në 14 Maj, secili të votojë për përfaqësuesin e vet. Dhe përfaqësuesi ynë nuk mund të jetë as Erion Veliaj dhe as rrethi i VIP-ave të showbizit”, vijon Endri Shabani./newsbomb.al
