Ivan Balliu ka dhënë një rrëfim shumë të gjatë për gazetarin Ivan Vargas, ku ndër të tjera ka folur edhe për Kombëtaren. Mbrojtësi i djathtë ka pranuar se ndihet krenar që është shqiptar, pasi në vendin tonë trajtohet në mënyrën më të mirë të mundshme. Lojtari i Rajo Vajekanos ka folur për rritjen që ka pësuar ekipi kombëtar që nga momenti kur ai mori ftesën e parë si dhe çmenduritë që bëjnë tifozët vetëm për të qenë të pranishëm në “Air Albania”.
“Kur mbërrita unë nuk ishte i njëjti ekip kombëar si tani, ku mund të shohësh një lojtar nga Interi, një nga Atalanta, një tjetër në huazim nga Çelsi… niveli jonë është rritur shumë dhe nuk është i njëjtë me ç’ka qenë më parë. Atëherë isha një prurje e re, ndërsa tani jam një nga veteranët. Vendi është shumë mbështetës dhe ndihesh si një mbret, sepse të trajtojnë në mënyrë spektakolare në çdo mënyrë. E vërteta është se ndjej shumë kënaqësi dhe krenari që jam shqiptar.
Tifozët? Është një çmenduri. Jam me shumë fat që shijon fundjavën në Vajekas dhe më pas shkoj me Kombëtaren dhe është po njësoj. Plus, kanë ndërtuar një stadium të ri që është super i mbyllur dhe britma më e vogël ka një jehonë të pabesueshme. Biletat shiten të gjitha shumë kohë përpara se të luajmë. Jemi me fat që gjithmonë kemi qenë në garë deri në ditët e fundit, si në Europian, ashtu edhe në Ligën e Kombeve. Biletat fluturojnë. Në fakt, në një ndeshje vendimtare për kualifikueset e Europianit, dikush bëri një promocion, ku nëse blije një Smart, atëherë përfitoje dy bileta. Njerëzit blenë makinën për të pasur mundësinë që të merrnin biletën. Thjesht për të dhënë idenë e çmendurisë”, ka treguar Ivan Balliu./Sport Ekspres/
