Tema kryesore e këtyre ditëve në mediat shqiptare ka qenë organizimi i kampionatit europian U-21 për vitin 2027 mes Shqipërisë dhe Serbisë. Sigurisht që e gjitha kjo çështje ka marrë trajtën e përfshirjes emocionale dhe me të drejtë tifogrupet shqiptare kanë bërë reagimin e tyre duke dalë kundër organizimit pasi të gjitha mesazhet që ata përcjellin në ndeshjet e Kombëtares, bien ndesh qoftë edhe me bashkëpunime të tilla që ndodhin çdo ditë në rang institucional mes shteteve, por këtë herë thjeshtë ka marrë fryrjen mediatike.
Të gjithë mediat kanë folur për grushtin e Lorik Canës në Beograd, për shishet e hedhura nga Taulant Xhaka si një luan në Serbi, por askush për formën reale të bashkëpunimit që do të ndodh dhe për qëllimin e vërtetë të këtij organizimi.
Bashkëpunimi që Shqipëria do të ketë me Serbinë do të jetë vetëm në rang institucional, asgjë më shumë se kaq dhe kjo nuk do të ndodh vetëm për Europianin e U-21, ndodh gjithmonë, me çdo shtet, Federatë. UEFA cakton ndeshjet që do të luhen në Shqipëri dhe ato që do të luhen në Serbi. FSHF do të merret vetëm me ndeshjet që do të caktohen për t’u luajtur në stadiumet tona dhe Serbia merr përsipër ndeshjet që do të luhen në stadiumet e tyre.
Mbi të gjitha, edhe kreu i FSHF, Armand Duka, ka konfirmuar se nuk do të kemi një “Ballkan aq të hapur” në futboll sa në politikë. Pra ndeshjet e Shqipërisë nuk do të luhen në Serbi për të treguar mesazhe për “sy të botës”, por përballjet e Kombëtares tonë do të luhen në vendin tonë dhe ato të Serbisë, në Serbi.
Një prej objektivave dhe qëllimeve kryesore të paarritura nga Armand Duka sa i përket synimeve të tij rreth ekipeve kombëtare ka qenë mungesa e kualifikimit të Shqipërisë U-21 në Europian. Nëse me Kombëtaren A ia ka dalë dy herë, me Shqipërinë U-21, ende jo. Dhe me këtë organizim që Shqipëria ka marrë, Shqipëria U-21 do të kualifikohet për herë të parë, pa luajtur në ndeshje kualifikuese. Pra Shqipëria U-21 do të shkojë në Europian ashtu siç ka bërë dy herë Shqipëria A. Madje si për ironi të fatit, edhe në herën e parë që Shqipëria A u kualifikua në Europian, pati një “bashkëpunim” me Serbinë, pasi ishim në të njëjtin grup me ta, vetëm se këtë herë të dy ekipet janë të kualifikuara në fazën finale, ndryshe nga më parë që Serbia mbeti jashtë.
I njëjti bashkëpunim do të jetë edhe këtë herë, po ai institucionali pasi edhe në Europianin e 2016 të dyja Federatat Sportive duhej të shkëmbenin informacione për organizimin sa më të mirë të ndeshjes. Dhe nëse i futemi të njëjtës logjikë, edhe në atë kohë, duhej kërkuar që Shqipëria të dilte nga grupi, të refuzonte të luante dhe t’i humbte ndeshjet në tavolinë.
Dhe në fund, çfarë të mire sjell që Shqipëria organizon Europianin U-21? Fakti që do të luajë në fazën finale të Europianit dhe do të ketë shumë talente yje që kanë refuzuar Shqipërinë, të cilët tani do të lënë fanellat e shteteve të tjera për të veshur atë kuqezi pasi Europiani i U-21 ka shumë reklamim dhe skautë të shumë klubeve. Për këtë arsye, është në interesin e lojtarëve që të jenë pjesë e fazës finale të Europianit dhe tani kemi një armë më shumë për t’i bindur që të vijnë te Shqipëria. Njëkohësisht edhe futbollistët e rinj të Superiores që do të grumbullohen nga Alban Bushi, nëse do të jetë ende trajneri ynë deri në atë kohë, do të luajnë kundër talenteve më të njohur që luajnë në La Liga, Serie A apo Premier League. Dhe në rast të një performancë të mirë të tyre, do të kenë mundësinë për të bërë edhe kalimin e madh të karrierës pasi skautë e shumë klubeve do të jenë me vëmendjen maksimale për t’i ndjekur nga afër. /Sport Ekspres/
