Ish-deputeti i Partisë Demokratike, Gerti Bogdani, ka humbur jetën në moshën 44-vjeçare pas një arresti kardiak.
Ai u shtrua në urgjencën e QSUT mesditën e sotme pasi ndërsa po merrte pjesë në një konferencë pësoi arrestin kardiak.
Pavarësisht përpjekjeve për ta shpëtuar, ai nuk arriti të mbijetojë.
Karrierën politike, Bogdani e filloi në vitin 2007. Ai kandidoi me Partinë Demokratike për Kryetar të Njësisë Bashkiake nr. 10 Tiranë, garë të cilën e fiton. Gjate kësaj kohe vazhdoi edhe aktivitetin si zëdhënës politik i PD. Në vitin 2009, Gerti Bogdani, kandidoi në Zgjedhjet Parlamentare të 28 qershorit 2009, dhe u zgjodh deputeti më i ri në Kuvendin e Shqipërisë. Nga viti 2009 e në vijim, ai vazhdoi aktivitetin e tij si Kryetar i Forumit Rinor të Partisë Demokratike.
Në vitin 2011 ai u zgjodh zv/president i “Bashkimit Ndërkombëtar të të Rinjve Demokratë” (International Young Democrat Union – IYDU) e më pas, në janar të vitit 2012, nën/Kryetar. Në shtator 2015 u zgjodh Kryetar i IYDU, ne Kongresin e zhvilluar në Lisbonë të Portugalisë, duke u bërë kështu politikani i parë shqiptar që mban një post kaq të lartë në një organizatë ndërkombëtare.