Kënga “Mora Fjalë”, që nisi të këndohej nga të gjithë tifozët shqiptarë pas kualifikimit historik të Shqipërisë në Europianin e Gjermanisë, tani është ndaluar që të këndohet në stadium.
Lidhur me këtë ka ardhur një reagim nga Lorik Cana dhe Shkurte Fejza.
“Unë jam ndier shumë e nderuar që më kanë ftuar të këndoj në stadium dhe ka qenë një përjetim i jashtëzakonshëm. Por kënga që është e ndaluar ose e mohuar, për mua është diçka e pakuptimtë. Më dhemb sepse kjo këngë është për një figurë të shenjtë që ka Kosova dhe konsiderohet një figurë e shenjtë dhe për Shqipërinë. Kjo këngë mori përmasa nga stadiumi”, tha artistja.
Këtë vendim e komentoi dhe ish-kapiteni i Kombëtares, Lorik Cana, i cili u shpreh se asgjë nuk do t’i ndalojë tifozët që ta këndojnë.
“E lexova pak në rrjete. Nuk është se kam pasur një vëmendje të madhe, por është një fat që e kemi një Shkurte Fejzaj që për ne në Kosovë është një figurë e veçantë. Sa i përket pjesës së këngës, të them të drejtën nuk jam shumë brenda ngjarjes, por një gjë është e sigurt, mos t’i japim aspekt negativ. Kënga do këndohet nëpër shkolla, nëpër stadiume. Dhe kur këndojnë tifozët, askush nuk mund t’i ndalë. Nuk e shoh që të mbahet si polemikë. Sa i përket këngës “Mora fjalë”, është këngë e popullit tonë, e sakrificave dhe kur këndohet në stadium, nuk ka asgjë që e ndalon, me muzikë apo pa muzikë në sfond”, tha Cana.
