Silvinjo, çfarë ke bërë?! Pyetja që të gjithë çojnë nëpërmendje pas mbrëmjes së sotme. Shqipëria ka treguar një nivel të jashtëzakonshëm nën drejtimin e trajnerit brazilian, teksa sot ka shpartalluar atë që shihej si një nga ekipet favorite për të shkuar në Europian. Kuqezinjtë kanë mposhtur me shifrat e pastra 3-0 Republikën Çeke në “Air Albania”.
Jasir Asani ndezi tifozerinë shqiptare që në minutën e 9 të takimit. Ish-lojtari i Partizanit veproi njësoj si me Poloninë. Mori topin, hyri nga e djathta e sulmit drejt qendrës dhe shkarkoi të majtën e tij. Topi shkoi në rrjetë, duke shtangur çekët që në minutat e para. Kundështarët e shtyjnë topin në rrjetë në minutën e 39, por sfera ishte prekur me dorë dhe arbitri i tregon kartonin e dytë të verdhë. Çekia mbetet me 10 lojtarë, duke ia vështirësuar edhe më shumë punët vetes.
Shqipëria e rrit edhe më shumë ritmin në pjesën e dytë të takimit dhe kilometrat e vrapuara shpërblehen. Taulant Seferi shkund rrjetën dy herë (51’, 73’) dhe fikson shifrat në 3-0. Por fatin e tij nuk e pati Muja, i cili arriti të shënonte golin e tij të parë, por VAR-i i shuajti festën për pozicion jashtë loje. Shqipëria merr tre pikë dhe ruan kreun e renditjes, teksa vetëm 2 pikë e ndajnë nga Gjermania. Festa është e gjitha legjitime, shijoje Shqipëri. Më poshtë gjeni intervistat e protagonistëve për “Supersport”:
Ramadani: “Kjo është një natë e madhe. Ne nuk u futëm për barazim sot, për 0-0. E përqafova babin, ishte shumë i lumtur. Më tha se ka edhe një ndeshje të mbetur, më tha se nuk ka mbaruar akoma. Jemi shumë afër, kjo ishte natë e madhe. I thashë Ajetit dhe Gjimshitit që kur Shqipëria shkoi në Europian unë isha në Kosovë. Sot ishim shumë kompakt si ekip, nuk i lamë asgjë çekëve për të rrezikuar përveç atij goli me dorë.
Seferi: “Jam shumë i lumtur për fitoren, ishte fantastike para të gjithë shqiptarëve. Kishte kohë që nuk shënoja për Kombëtaren dhe erdhi në momentin e duhur. E di që shumica nuk ka besuar te unë, por ia shpërbleva trajnerit. Dhe unë jam një njeri i thjeshtë që shoh komentet, nuk kanë besuar te mua. Falenderoj trajnerin, Zotin dhe familjen time, por edhe këta tifozë që na mbështetën”.