Një sipërfaqe prej 16 hektarësh e mbjellë me grurë ështe përfshirë nga flakët mesditën e sotme në fshatin Topojë në Fier.
Sipërfaqja e grurit në pronësi të Mili Sakos është shkrumbuar brenda pak minutash, pasi era ka favorizuar flakët duke rrezikuar edhe një stan aty pranë.
Sako duke folur për mediat tha se dëmi i shkaktuar është rreth 20 milion lekë të vjetra pasi parcela është shkrumbuar një ditë para korrjes.
Nuk e di si ndodhi. Isha duke punuar në një parcelë tjetër, vetëm kur pamë flakët, mendova se ishte ndonjë hamëll që kisha korrur. Lashë punën atje erdha, shiko unë po digjej gruri që ishte pa korrur. Sipërfaqia prej 16 hektarësh, pa prekur fare, pa korrur asnjë pëllëmbë, e përpiu flaka për një orë.
Lajmëruam zjarrfikësen dhe policinë. Në kohën që erdhi zjarrfikësja, flaka ikte me shpejtësi sepse e favorizonte era, ne e shikonim nuk kishin çfarë të bënim. Flakët kapën edhe stanin, por në atë kohë erdhi edhe zjarrfikësja dhe e fiku.
Si dëm llogarite 11 mijë lekë të reja dylymi, rreth 20 milion lekë të vjetra. Unë kisha 45 hektarë, kam korrur 25, kishin ngelur këto 16 hektarë këtu dhe disa hektarë tjerë në një tokë tjetër. Këtë këtu kisha planifikuar ta korrja nesër, por ma mori sot, nuk ma la për nesër.
I pyetur për shkakun e zjarrit ai tha se nuk e di, pasi nuk mendon të jetë e qëllimshme që dikujt t’i digjet buka e fëmijëve.
Nuk e di ngase është shkaktuar, nuk flas dot. Nuk kam dyshime, nuk kam njeri që të kem konflikt. Nuk besoj te zjarrëvënie e qëllimshme, ndoshta një dorë e gabuar. Nuk besoj, sepse nuk digjet buka e kalamajve. Nëse e ka bërë një dorë, haram të ketë bukën që ha. Është tmerr. Nëse ndonjë person do kishte gjë me mua, këtu më kishte, nuk kishte pse të bënte këtë, por sërish nuk e besoj. Në zonë ka pasur edhe zjarre të tjera, por jo në parcela të pa korrura.
