Një ngjarje tragjike ka ndodhur në familjen Reçi në Pistoia, Itali. Djali i familjes, Danieli vetëm 18 vjeç, ndërroi jetë në gjumë në shtratin e tij. Djaloshi humbi jetë mëngjesin e së mërkurës, ditë kur nëna shkoi për ta zgjuar nga gjumi, por vërejti se Danieli nuk merrte më frymë dhe zemra i kishte pushuar së rrahuri.
Pas kësaj, nëna e tronditur lajmëroi mjeket dhe policinë. Tashmë trupi i pajetë i Danielit është dërguar në spital ku pritet që të kryhet një autopsi për të zbuluar shkaqet e vdekjes. Danieli, bashkë me familjen kishte shkuar në Itali për të jetuar një jetë më të mirë.
Danieli ishte vetëm 17-vjeç kur mbërriti në Itali dhe ishte bërë pjesë në disa projekte në San Domenico për integrimin shoqëror të emigrantëve. Djali atje vazhdonte disa kurse për gjuhën italiane si dhe merrej me kurse për arte marciale pasi ishte fans i sportit taekwondo.
Danieli prej Dhjetorit jetonte në një shtëpi në Pistoia bashkë me mamanë dhe vëllanë e vogël, teksa mësohet se muajt e fundit ai po kërkonte një punë për veten e tij dhe të ishte i pavarur ekonomikisht.
