Përplasja me armë e grushte e ndodhur ditën e sotme në Kepin e Rodonit mes banorëve të fshatit dhe Kishës Françeskane ka zbuluar zallamahinë që po ndodh në kepin e privatizuar nga biznesmenët.
Prej vitesh çdokush që vendos të vizitojë Kepin e Rodonit është i detyruar të paguajë një tarifë prej 5€ madje edhe për të shkelur në zonën publike. Sipas atyre që deklaron kompania që mbledh fitimet, këto shkojnë për mirëmbajtjen dhe administrimin e kishës dhe kalasë.
Zbulohet se kompania që administron të ardhurat që u faturohet turistëve shqiptarë e të huaj është “Albania Tourist Resort” nën administrimin e Ana Shtjefnit me bekimin e Bashkisë Durrës, pavarësisht se prona është e sekuestruar nga SPAK me një hapësirë prej 60,000 m2.
Kjo e fundit u prezantua sot në media si përfaqësuese e Kishës Françeskane gjë që u mohua institucioni fetar. Sipërfaqja është në pronësi të Kishës Françeskane së bashku me Kishën e Shna Ndout dhe Kalanë e Skënderbeut dhe cilësohet si truall ndërsa në fokumentin e familjes Kaculi konsiderohet si tokë bujqësore e përfituar me ligjin 7501.
Kompania e Shtjefnit deklaron në pasqyrat financiare të biznesit të saj për vitin 2023 2 milion lekë mjete monetare ndërkohë që përsa i përket të dhënave nga Ministria e Turizmit Kepin e Rodonit vetëm në Janar 2022 e kanë vizituar mbi 2100 turistë.
Shtjefni e konsideron Kepin të vetin, e parë qartazi në postimet që bën në rrjetet sociale. Dyshohet se dokumenti i pronësisë është falsifikuar dhe është tjetërsuar për interes të palëve të treta të cilët kamuflohen në bazë të interesave fetare.
