Një ngjarje e rëndë ka ndodhur të dielën, më 18 Qershor në Indiana, SHBA.
Mediat raportojnë se një 49-vjeçar shqiptar me banim në Huntertown ka qëlluar disa herë ndaj gruas së tij 48-vjeçare dhe më pas ka vrarë veten e tij.
Një person thirri policinë mbrëmjen e së dielës duke thënë se nevojitej kujdes mjekësor në adresën e shtëpisë së shqiptarëve. Kur policia mbërriti në vendngjarje gjeti të vdekur 49-vjeçarin Arben Gllafce dhe gruan e tij Arjana Gllafce.
Vdekja e Arben Gllafcës thuhet se është shkaktuar nga plaga me armë zjarri dhe mënyra e vdekjes cilësohet si vetëvrasje. Ndërkohë që vdekja e Arjana Gllafcës është shkaktuar nga plagët e shumëfishta me armë zjarri dhe mënyra e vdekjes cilësohet si vrasje.
Shkaqet e kësaj ngjarjeje të rëndë momentalisht nuk dihen ende. Mjeku ligjor e cilësoi vdekjen e Arjana Gllafces si vrasjen e 13-të në qark për këtë vit.
Familjarët e shqiptarëve thuhet se janë njoftuar për ngjarjen e rëndë.
