Në dëshminë e dhënë para prokurorëve të SPAK dhe oficerëve të BKH-së, i penduari Erjon Alibej, ka shfajësuar rolin e të ndjerit Arben Laze në ngjarjen e vrasjes së Emiljano Ramzanit (Ilit), ngjarje kjo e ndodhur në muajin korrik 2020.
Njësoj si Arsen Preçin që e nxjerr pa faj dhe pa dijeni mbi aktivitetin kriminal, i penduari Alibej, ka nxjerrë pa dijeni dhe pa faj, Arben Lazen, dajën e gruas së tij, në magazinat e të cilit në Fushë-Mbret u fsheh për disa ditë makina tip “Passat”, që u përdor në vrasjen e Ramazanit.
Ish-presidenti historik i “FC-Elbasani” Arben Laze rezulton i dyshuar në veprimet e fshehjes së makinës para kryerjes së krimit dhe mbajtjes për disa ditë në ambientet e magazinës, të Nuredin Dumanit, Eljo Bitrit, Henrik Hoxhës dhe Skerdi Tasit.
Në dëshminë e tij, Erjon Alibej thotë se makina tip “Passat” është siguruar në Fushë-Krujë.
“…mbaj mend që Nuredini këtë makinë, pasi ka komunikuar me mua e ka lënë në Përparim tek dajat e mi. Kjo makinë “Passat” ka lëvizur dhe në vende të tjera, ka qenë dhe tek magazinat e dajës së nuses time, Arben Laze. Vendet e tjera nuk di se ku mund të ketë qëndruar kjo makinë. Në lidhje me automjetin “Passat”, më kujtohet se edhe disa ditë përpara vrasjes së Emiljano Ramazanit, “Kusho” Henrik Hoxha dhe “Nipçja” Skerdi Tasi, kanë ardhur në Elbasan për të kryer punën e vrasjes. Të dy kanë ardhur me një makinë të tyre, të cilën e kanë lënë në aksin Elbasan-Pegin, në vendin ku këta kishin planifikuar të merrnin dhe të sillnin makinën “Passat” dhe ta digjnin pas vrasjes. Në këtë rast vrasja nuk është kryer…”-ka treguar Alibej.
I penduari ka treguar se Arben Laze nuk ka pasur dijeni për planin dhe qëllimin e fshehjes së makinës në magazinën e tij, por ka vepruar sipas udhëzimeve që i ka dhënë ai, duke mos e s’qaruar për çfarë bëhej fjalë.
Ndërkohë i penduari tjetër Nuredin Dumani, ka treguar se makina “Passat” ka qenë e vjedhur dhe pas 3 ditësh, ai është kontaktuar nga Erjon Alibej, i cili i ka thënë që ta fshihte tek magazinat e Arben Lazes, në zonën e Fushë-Mbretit në Metalurgjik.
Në këtë vrasje, Dumani e etiketon Elio Bitrin si personin kryesor që kishte marrë përsipër të jepte ndihmë duke siguruar të dhëna për Emiljanon si, vendin se ku e kishte shtëpinë, servisin si dhe vendin ku ai bënte palestër.
Bashkëpunëtori i drejtësisë ka treguar se kur ka shkuar me “Passat”, në zonën e Metalurgjikut, tek shinat e trenit e priste Arben Laze, të cilin e ka ndjekur nga pas me makinë deri në ambientet e brendshme të magazinës.
Aty së bashku kanë mbuluar me mushama “Passatin” dhe janë larguar deri tek shinat e trenit, ku aty më pas e ka pritur Elio Bitri.
Gjatë qëndrimit në magazinë ata kanë kërkuar që pjesëmarrës në vrasje të ishte dhe Nuredin Dumani. Por ky i fundit ka refuzuar madje ka gjetur njerëz të tjerë, duke ja besuar vrasjen Henrik Hoxhës dhe “Nipçes” nga Fieri, Skerdi Tasi.
Komunikimet mes tyre kanë vijuar me telefona “Sky” deri në momentin e ekzekutimit. Emiljano Ramazani, është vrarë poshtë shtëpisë së tij, sapo kishte dalë nga palestra.
Ditën e krimit, Henrik Hoxha dhe Skerdi Tasi, lëviznin me makinën tip “Passat”, që Nuredin Dumani ja kishte lënë tek magazina e Arben Lazes në Fushë-Mbret.
Henriku ka qenë shofer i makinës, ndërsa Tasi ka zbritur nga mjeti dhe ka qëlluar 6 herë në drejtim të Ramazanit, duke e lënë të vdekur në vend. Makina tip “Passat”, më pas është gjendur nga policia e Elbasanit e djegur në fshatin Vidhas.
