Altin Lala ka komentuar listën e Kombëtares shqiptare për Kampionatin Europian 2024. Ish-lojtari shqiptar është shprehur në një lidhje të drejtpërdrejtë me “RTSH”-në se ndjen keq ardhje për lënien jashtë të Sokol Cikaleshit. Sipas tij, sulmuesit kavajas mund t’i ketë dhembur më shumë se kujtdo vendimi i Silvinjos, pasi mosha nuk e lejon të ëndërrojë sërish për një ngjarje tjetër kaq madhore sa Europiani.
“Janë surpriza që… sidomos për Cikalleshin, që më duket se i ka bërë të gjitha ndeshjet. Është shije shumë e hidhur, për faktin që është edhe në moshë. Duhet t’i ketë dhembur që nuk do të marrë pjesë në këtë event kaq të rëndësishëm. Çdokujt i dhemb, edhe Uzunit me Baren, por ata kanë prapë kohë të luajnë me Kombëtaren. Për Cikalleshin më vjen keq. Silvinjo ka bërë mirë (në stolin e Kombëtares) dhe nuk duhet ta paragjykojmë. Ai na ka surprizuar më parë me marrjen e Asanit, që ishte një faktor në sulm që ne u kualifikuam. Jam kureshtar, ose do të na surprizojë të gjithë, ose do të jetë e anasjellta, që do të marrë vetëm 23 lojtarë”, ka deklaruar Altin Lala.
