Granit Xhaka në fund të sezonit u përshëndet me tifozët e Arsenalit, pasi largimi i tij mund të quhej fakt i kryer. Megjithatë, duket se në ditët e fundit situata ka ndryshuar 180 gradë. Trajneri Mikel Arteta ka reflektuar dhe ka ndryshuar mendje në lidhje me planin e tij mbi Xhakën.
Mediat angleze raportojnë se trajneri i Arsenalit ka telefonuar Granitin dhe i ka kërkuar që të respektojë kontratën me Arsenalin dhe të qëndrojë edhe në sezonin e ardhshëm me ekipin e “Topçinjve”. Për Xhakën interesohet Bayer Leverkusen, por në një moment u shfaq edhe Bayern Munchen.
Tashmë situata ka ndryshuar dhe Xhaka mund të qëndrojë në Londër, aty ku ka kaluar disa vite me ulje-ngritje, por gjithnjë është konsideruar një luftëtar dhe një lider në fushën e lojës. Arsenal nuk mund ta gjejë një zëvendësues për të dhe është vendosur që Xhakës t’i kërkohet të qëndrojë.
I ardhur që nga viti 2016, Xhaka ka edhe një vit kontratë, me opsionin e rinovimit edhe për një tjetër në varësi të klubit. As ardhja e mundshme e Declan Rice nuk do e mbulonte hapësirën e lënë bosh nga Xhaka, sepse ylli i Zvicrës mund të shkëlqejë edhe në rolin e lënë bosh nga Thomas Partey.
Xhaka ende nuk e ka marrë vendimin përfundimtar në lidhje me të ardhmen e tij, por në këtë rast Arsenali mund ta bllokojë edhe duke refuzuar ofertat që mbërrijnë në drejtim të tij. Aktualisht mesfushori po shijon pushimet dhe pas rikthimit në javën e parë të korrikut, ai do të qartësojë të ardhmen.
