Durim Bami, i cilësuar si një nga eksponentët kryesor të krimit shqiptar dhe i kërkuar nga drejtësia për disa ngjarje të rënda kriminale, nuk do të ekstradohet. Një gjykatë në Dubai ka urdhëruar dje lirimin e tij të menjëhershëm nga qelia.
Lajmin e konfirmon gazetari Artan Hoxha, i cili thotë se pas 60 ditësh nga dita e ndalimit dhe bërja publike me bujë në Shqipëri, Durim Bami është liruar.
I cilësuar si “i forti i Niklës”, ai ka arritur të fitojë betejën me autoritetet shqiptare, të cilat ashtu si edhe në rastet e mëparshme, kanë dështuar të ekstradojnë nga “Perla e Gjirit” shtetas të kërkuar nga Prokuroria e Posaçme.
“Arrestimit i Bamit u cilesua nje sukses i madh dhe autoritetet shqiptare, kryesisht SPAK, Ministria e Brendeshme dhe Ministria e Drejtesise, te cilat premtuan se do te kryenin te gjitha levizjet per ta ekstraduar Bamin nga Dubai, qofte edhe duke tentuar deportimin e tij”, shkruan Artan Hoxha.
Megjithatë, pavarësisht lajmeve të bujshme në Shqipëri, Durim Bami tashmë është lënë i lirë dhe vazhdon i qetë jetën në Dubai, ashtu si gjithë personat e kërkuar globalisht, të cilët shkojnë në Emirate për shkak të mungesës së një ligji ekstradimi.
“Mesditen e se henes me 12 gusht 2024, fiks 60 dite pasi gjykata e Dubait kishte vendosur arrestin me burg per Durim Bamin, e njejta gjykate urdheroi lirimin e tij te menjehershem.
Prej dites se djeshme Bami eshte i lire ne qytetin e Dubait ku do vazhdoje te jete “i paekstradueshem” per autoritetet shqiptare pavarsisht hetimeve qe kryhen ne ngarkim te tij nga SPAK dhe urdher-arrestit nderkombetar te leshuar nga Interpol, i cili mbetet ne fuqi”, vijon gazetari.
