Gjatë sezonit të verës dhe fillimit të vjeshtës, turizmi në Shqipëri është përballur më një ulje të ndjeshme të vizitorëve nga Kosova. Shifrat zyrtare tregojnë se në gusht numri i vizitorëve nga Kosova filloi të pësonte rënie, ndërsa në shtator u shënua një rënie prej 19.2% krahasuar me shtatorin e vitit të kaluar.
Rënia u paralajmërua që në qershor nga operatorët turistikë, se rezervimet e këtij grupi ishin të ulëta teksa rritja e çmimeve në disa rajone u bë më pas virale në internet dhe sidomos zhvlerësimi i euros kanë dhënë goditjen tjetër duke pakësuar këtë prezëncë muaj pas muaji, diçka që ka kulmuar këtë shtator.
Ndonëse arsyetohet se liberalizimi i vizave ka ndikuar këtë rënie, duke bërë që qytetarët e Kosovës të eksplorojnë të tjera destinacione, rritja e çmimeve luan një rol kyç në këto shifra.
Përveç turizmit patriotik, është vënë re një ulje edhe në numrin e turistëve çekë, të cilët tradicionalisht kanë treguar interes për turizmin e organizuar në Shqipëri.
Këto faktorë kanë ndikuar në uljen e suksesit të sektorit turistik këtë sezon, pavarësisht propagandës se sektori ka njohur rritje.
