Konsumuan ushqim në anijen turistike, 50 pushues përfundojnë të helmuar në spitalin e Vlorës, mes tyre dhe 5 fëmijë

Rreth 50 turistë janë helmuar pasi dyshohet se kanë konsumuar ushqim në një anije turistike në Vlorë.

Mësohet se turistët ishin duke udhëtuar me anijen “Black Pearl” në itinerarin Sazan – Karaburun, dhe kanë konsumuar ushqimin e shërbyer.

Ndonëse shkaku i helmimit nuk është përcaktuar ende, dyshohet të ketë ardhur pikërisht nga ushqimi.

Turistët janë paraqitur në urgjencën e Spitalit të Vlorës me të vjella dhe kanë marrë ndihmën e parë, ndërsa mes tyre janë edhe 5 fëmijë të cilët po trajtohen në pediatri.

Raportohet se numri i turistëve të helmuar mund të arrijë deri në 70. Sakaq, Drejtoria e Shëndetit Publik ka nisur një hetim për rastin në fjalë.