Anxhelo Avdiu, i riu shqiptar i shpallur i zhdukur prej disa javësh, është gjetur i varur në Greqi.
Mediat greke raportojnë se trupi i 29-vjeçarit, gjurmët e të cilit kishin humbur që në mëngjesin e 29 tetorit, nga zona e Bartolomeut, ku kishte vizituar të afërmit, është gjetur në një pemë në një shtëpi fshati në zonën e Diasporës në Kyllini. Veshjet dhe sendet e tij personale kanë konfirmuar identitetin e tij kur të afërmit e tij janë thirrur nga autoritetet për identifikimin.
Një tjetër element që identifikoi 29-vjeçarin shqiptar ishte proteza e tij, e cila u njoh nga nëna e thirrur në këtë detyrë jashtëzakonisht të vështirë. Fakti që trupi i shqiptarit u gjet në një lartësi prej rreth tre deri në katër metra dhe duart e lidhura me lak, bën që oficerët e policisë të mos përjashtojnë as mundësinë e një veprimtarie kriminale.
Pas identifikimit vizual të bërë nga të afërmit e tij, krahasimi i ADN-së me mostrën e të afërmve të tij është urdhëruar në Drejtorinë e Hetimeve Kriminale të Shtabit të Policisë Helenike për të konfirmuar zyrtarisht identitetin e trupit. Vëllai i 29-vjeçarit tha për gazetën “Patris” se si ai dhe e gjithë familja e tij janë të shkatërruar dhe se brenda ditëve në vijim pritet t’i merret një mostër biologjike nga nëna e 29-vjeçarit për t’u identifikuar përmes ADN-së.
Ndërkohë, autoritetet, të cilat po shqyrtojnë me kujdes të gjitha provat që ekzistojnë deri më tani, kanë mbledhur gjurmët e gishtërinjve si nga laku që mbështjellë duart e të riut , ashtu edhe nga shkalla që u gjet shumë afër vendit ku ishte varur kufoma.
Trupi i pajetë i shqiptarit u gjet në një shtëpi fshati mëngjesin e së shtunës së kaluar nga pronari i shtëpisë që jeton jashtë Ilisë dhe mungonte për një kohë të gjatë. Pronari i shtëpisë ka shkuar në vendngjarje të premten mbrëma dhe era e keqe ishte vënë re menjëherë. Të nesërmen në mëngjes kur ai kishte kërkuar se nga vinte kjo erë, ishte përballur me tmerrin, pasi kishte parë trupin e të riut të varur në një nga pemët e shtëpisë dhe në të vërtetë në një lartësi shumë të lartë, që vështirë se do të vihej re nga askush.
