Vrasja e një tjetër gruaje tronditi një ditë më parë Italinë fqinje. Vanessa Ballan, vetëm 26-vjeçe dhe shtatzënë me fëmijën e saj të dytë, u masakrua me thikë në shtëpinë e saj në Veneto. Ngjarja e rëndë ndodhi të martën në Spineda, Riese Pio X, një komunë me 10 mijë banorë që ndodhe rreth 40 minuta larg Treviso-s. E reja punonte si arkëtare në një supermarket.
Ajo ishte 3 muajshe shtatzënë dhe prej 3 javësh kishte marrë lejen e parakohshme të lindjes. Vanessa kishte një djalë 4 vjeç, i cili në momentin e ngjarjes ndodhej në kopsht.
Autor i dyshuar i këtij krimi është Bujar Fandaj, një 41-vjeçar nga Kosova, i cili u arrestua disa orë pas krimit, pranë shtëpisë së tij në Altivole.
Sipas të dhënave të deritanishme që përcjell Corriere della Sera, Fandaj dyshohet se hyri me forcë në shtëpinë e viktimës duke e sulmuar gruan shtatzënë e cila ndodhej ende me pizhame. Fillimisht e dhunoi fizikisht, më pas e goditi të paktën 7 herë më thikë. Në duart e 26-vjeçarjes raportohet se kishte shumë plagë, me gjasë pasi Vanessa tentoi të mbrohej deri në moment të fundit.
Alarmin e dha bashkëshorti i viktimës, Nicola Scapinello, i cili kishte shkuar në shtëpi për drekë, si dhe një fqinj. Pavarësisht alarmit, shërbimet e emergjencën nuk mundën të bënin asgjë për 26-vjeçaren. Vanessa kishte vdekur për shkak të plagëve të rënda që kishte marrë në kraharor.
Sipas të dhënave të deritanishme viktima dhe vrasësi njiheshin. Ata raportohet se kishin pasur një lidhje të shkurtër dashurie në të shkuarën. Marrëdhënie që sipas mediave italiane ishte mbyllur keq, aq sa ajo kishte pranuar se ndihej e frikësuar prej 41-vjeçarit.
