Një altar i improvizuar, me një foto dhe disa qirinj të ndezur, rreth e rrotull, një heshtje plot emocione: kështu e kujtuan Erion Balin miqtë e komunitetit shqiptar, klientët dhe familjarët e mbledhur në lokalin që zotëronte, bar taverna la Grigliata, në via Francesco Soldi, Itali.
38-vjeçari shqiptar po kthehej në shtëpi pasi shkoi në restorant për të bërë pak pastrim në fillim të vitit, kur humbi kontrollin e makinës së tij, në rrethrrotullimin e San Felice, në via Mantova, duke përfunduar në bordurat mbrojtëse të rrugës. Pavarësisht ndërhyrjes së mjekëve, ai nuk mundi të mbijetonte.
Erioni, i cili kishte një grua dhe ishte baba i tre fëmijëve, më i vogli prej të cilëve ishte vetëm disa muajsh, kishte hapur biznesin së bashku me një partner. Ai ishte shumë krenar për fillimin e ri që e priste dhe të gjithë e kujtojnë atë si një punëtor të madh, entuziast për këtë aventurë të re profesionale.
Ai kishte jetuar në Cremona për më shumë se 20 vjet dhe ishte integruar në mënyrë të përkryer në zonë. Vëllai i tij Ervisi thotë:
“Ia kam dëgjuar zërin për herë të fundit mëngjesin e 1 janarit, në telefon, për të shkëmbyer urime për Vitin e Ri. Ne ishim shumë të afërt, ashtu si të gjithë ne në komunitetin shqiptar. Erioni ishte vëlla me të gjithë”.
Varrimi i tij do të bëhet të enjten në orën 11:00 në varrezat e Cremones.
