Një 24-vjeçar shqiptar ka humbur jetën në një aksident tragjik të dielën në Itali.
I riu shqiptar i identifikuar si Qerim Gjepali po udhëtonte si pasagjer në një automjet tip “Mercedes CLK” kur humbi jetën. Ky automjet drejtohej nga një 23-vjeçar shqiptar i cili mbeti i plagosur së bashku me një 19-vjeçar rumun.
Makina e të rinjve u përplas me një pemë dhe i riu shqiptar, pasagjer në sediljen e parë nuk mundi të mbijetonte. Autoambulancat bënë transportimin në spital të dy të plagosurve të tjerë, ndërsa autoritetet vijojnë punën për zbardhjen e rrethanave të aksidentit.
Tri hipotezat për këtë aksident tragjik janë: defekt teknik i mjetit, problem shëndetësor i shoferit ose manovër e papritur për të shmangur një pengesë në rrugë.
Qerim Gjepali kishte lindur në Durrës më 19 dhjetor 1998 dhe që prej vitit 2016 jetonte në Massa Lombarda bashkë me familjen e tij. Lajmi për vdekjen tragjike të tij u përhap me shpejtësi në komunën e Ravenna-s pasi shqiptari ishte tepër i njohur.
