Mbrëmjen e djeshme në Orange Club në Sarandë u regjistrua një tragjedi. Në lokalin e Spiro Iljadhit, u këput kavoja e ashensorit që përdorej kryesisht për furnizimin e lokalit, duke zënë poshtë 17-vjeçarin Antonio Delilaj.
Lidhur me ngjarjen e u arrestua montuesi i ashensorit Lulëzim Allkushi 43 vjeç, teksa kërkohet pronari i klubit, 37-vjeçari Spiro Iljadhi pasi akuzohen për veprën penale ”Shkelja e rregullave të mbrojtjes në punë”.
Ndërkohë pronari i Orange Club Saranda është një emër i njohur, pasi në vitin 2021, 20 plumba janë zbrazur në drejtim të tij. Asokohe 35 vjeç, Iljadhi u qëllua me armë nga 3 autorët, Andrea Caushi, Visi Caushi të dy vëllezër dhe shoku i tyre Redjan Hadëri.
Si pasojë e të shtënave, plumbat kapën rastësisht edhe pushuesin shqiptaro-amerikan Marin Jano, 33-vjeç. Ngjarja në fjalë, e para 2 viteve ndodhi si pasojë e një konflikti çasti. Spiro Iljadhi që njihet edhe me emrin Ermal Iljazi, ndërsa shkurt thirrej ‘Ero’, është biznesmen në zonë dhe është pronar i lokalit Bar Orange në Sarandë dhe Orange Pizza & Grill Lounge në Ksamil.
