Halli më i madh i prindërve shqiptar në ditët e sotme nuk janë notat e maturës për fëmijët e tyre, por me çfarë makine do shkojnë në mbrëmje. Në një vend që po varfërohet çdo ditë, mendjemadhësia kalon kufijtë e humanes dhe të gjithë duan të duken si “boba” qoftë edhe për disa orë. Vit pas viti gjimnazistët konkurojnë njëri-tjetrin se kush ka marr makinën më të shtrenjtë e më të fundit në qarkullim.
Një biznes edhe për kompanitë që ofrojnë makina me qira, të cilat po rrisin fitimet falë kapriçove të gjimnazistëve. Nga 200 deri në 500 euro, dhe në disa raste 1 mijë euro kushton marrja me qira e një makine për maturë. Markat “G Class”, “Audi”, “BMW” apo “Rang Rover”, konkurojnë njëra-tjetrën në mbrëmjen e maturës.
Gjimnazistët janë të gatshëm të shpenzojnë edhe sa tre vitet e tarifës se universitetit për një natë, në një shpenzim luksi të pamenduar. Në rrjetet sociale gjeni video sesi maturantët po djegin gomat e makinave të luksit në mbrëmjen që i largon nga gjimnazi dhe i çon drejt universitetit, aty ku nis realisht jeta për një të ri.
