Maliq Marku, 70-vjeçari që vrau fqinjin e tij për një kanal është penduar për krimin e kryer.
I pyetur nga oficerët e policisë për shkakun e ngjarjes së rêndë, Marku ka thënë se viktima Shefqet Hasa dhe i plagosuri Bekim Keça e kishin ofenduar dhe pastaj në gjaknxehtësi e sipër ka qëlluar ndaj tyre për vetëmbrojtje.
Ngjarja ndodhi shumë shpejt, Shefqet Hasa dhe Bekim Keça më ofenduan. Kemi pasur mosmarrëveshje për kanalizimet kërkova që të sqaroja situatën. Në gjaknxehtësi e sipër mora armën dhe qëllova ndaj tyre. Qëllova për vetëmbrojtje, jam penduar për veprimin tim.
70-vjeçari me pistoletën TT që mbante në shtëpi qëlloi 6 herë, 4 plumba lanë të vdekur Hasën dhe 2 të tjerë plagosën Keçën, i cili ndodhet në spital jashtë rrezikut për jetën.
Një kanal i ujërave të zeza është bërë shkak për ngjarjen e rëndë. Banorët e lagjes me paratë e tyre kishin rregulluar kanalin e ujërave të zeza. Por Maliq Marku duke qenë në Angli nuk kishte paguar për këtë kanal.
Pas kthimit nga Anglia, ai ka dashur të lidhte kanalizimin me banesën e tij dhe për këtë arsye ka shkuar tek ujësjellësi. Pas piketimit të kryer nga punonjësit e ujësjellësit, kanë nisur debatet mes fqinjëve të cilët nuk kanë pranuar kanalizimet e Markut. Ky i fundit në gjaknxehtësi e sipër ka vrarë Hasën dhe plagosur Keçën.
