Sot u zhvillua java e parafundit e Kategorisë Superiore dhe Tirana humbi vendin e parë në tabelën e klasifikimit, pas barazimit 2-2 me Bylisin dhe fitoren 1-4 të Partizanit kundër Kastriotit.
Bardheblutë kaluan dy herë në avantazh dhe herën e dytë u barazuan me një penallti mjaft të dyshimtë të akorduar nga gjyqtari Kridens Meta. Kjo ka sjellë tensione në fundin e ndeshjes, ku kryeqytetasit protestuan ashpër.
VIDEO tjeter nga tifozet ne fushe
I gjithë stafi teknik dhe presidenca zbriti në fushë, me polemikat që shoqëruan pasndeshjen. Protesta edhe nga trajneri Orges Shehi, që u pa në një tjetër version në këtë fund ndeshje. Vetë presidenti Refik Halili zbriti në fushë, dukshëm për të qetësuar të tijtë.
Më pas, ishin tifozët e tensionuar të cilët hynë në fushë të shumtë në numër, duke rrethuar gjyqtarin dhe duke tentuar të godasin atë dhe vijërojtësit. Policia dhe forcat e sigurisë, ia dolën pas disa çastesh kaosi të shoqëronin në dhomat e zhveshjeve gjyqtarët e sfidës.
Me këtë barazim një javë nga fundi i Superligës, Partizanit dhe Tirana janë me pikë të barabarta (64), me të kuqtë që për shkak të ndeshjeve direkte mbajnë kreun.