Në fshatin Fushë Kuqe të Kurbinit është kapur një sasi e madhe heroine, që konsiderohet si një nga drogat më të rënda në qarkullim. Policia ka njoftuar kapjen e 41 kilogramë e 700 gramë kokainë, që transportohej me makinë tip “Benz”.
Policia ka arritur të arrestojë drejtuesin e mjetit, teksa është shpallur në kërkim bashkëpunëtori i tij. Në fund të operacionit, u arrestua në flagrancë A.P, 31 vjeç, banues në Fushë Kuqe, Kurbin dhe u shpall në kërkim bashkëpunëtori i tij, shtetasi R. G, banues në Sukth.
Policia kishte marrë informacione për këtë ngarkesë dhe kishte arritur të lokalizonte mjetin e dyshimtë, duke iu vënë më pas në ndjekje. Në afërsi të rrethrrotullimit të aeroportit të Rinasit është bërë i mundur ndalimi i automjetit të dyshuar.
Në bagazhin e “Benzit” u gjet një kuti me 62 pako brenda të cilave kishte 41 kg e 700 gram lëndë të dyshuar narkotike heroinë, të cilat u sekuestruan në cilësinë e provës materiale së bashku me automjetin dhe 1 mjet prerës. Vijojnë hetimet për persona të tjerë të përfshirë në këtë ngjarje.